COMME FACETTE MAMMETA
(Capaldo - Fassone 1906)
Scritta nel 1906 da Capaldo e musicata da Fassone, gli autori con questo motivetto allegro, ironizzano ed esaltano la bellezza di una ragazza coinvolgendo i colori e i profumi della natura, addirittura paragonandola alla stessa bellezza della natura. identificandola con essa. Nasce così una nuova forma ironica di serenata, la stessa ironia che accompagna il popolo Napoletano da sempre.
Quanno màmmeta t'ha fatta,
quanno màmmeta t'ha fatta...
Vuò sapè comme facette?
vuò sapè comme facette?...
Pe' 'mpastà sti ccarne belle,
pe' 'mpastà sti ccarne belle...
Tutto chello ca mettette?
tutto chello ca mettette?...
Ciento rose 'ncappucciate,
dint''a màrtula mmescate...
Latte, rose, rose e latte,
te facette 'ncopp''o fatto!...
Nun c'è bisogno 'a zingara
p'andivinà, Cuncè'...
Comme t'ha fatto màmmeta,
'o ssaccio meglio 'e te!...
E pe' fà 'sta vocca bella,
e pe' fà 'sta vocca bella...
Nun servette 'a stessa dose,
nun servette 'a stessa dose...
Vuò sapè che nce mettette?
Vuò sapè che nce mettette?...
mo te dico tuttecosa...
mo te dico tuttecosa:
nu panaro chino, chino,
tutt''e fravule 'e ciardino...
Mèle, zuccaro e cannella:
te 'mpastaje 'sta vocca bella...
Nun c'è bisogno 'a zingara
p'andivinà, Cuncè'...
Comme t'ha fatto màmmeta,
'o ssaccio meglio 'e te...
E pe' fà sti ttrezze d'oro,
e pe' fà sti ttrezze d'oro...
Mamma toja s'appezzentette,
mamma toja s'appezzentette...
Bella mia, tu qua' muneta!?
bella mia, tu qua' muneta!?
Vuò sapè che nce servette?
vuò sapè che nce servette?...
Na miniera sana sana,
tutta fatta a filagrana,
nce vulette pe' sti ttrezze,
che, a vasà, nun ce sta prezzo!
Nun c'è bisogno 'a zingara,
p'andivinà, Cuncè'...
comme t'ha fatto màmmeta,
'o ssaccio meglio 'e te..