ERA DE MAGGIO
Di Giacomo, Costa (1885)
Fu scritta da Di Giacomo un anno dopo la perdita del padre a causa del colera. Quando Di Giacomo spedi' a Mario Costa il testo nel 1885 aggiunse:"Mario, ma quanto e' bella". Costa gli rispose musicando i versi ed aggiungendo:"Salvato', e chesta manco e' scema!"
Era de maggio e te cadèano 'nzino,
a schiocche a schiocche, li ccerase rosse...
Fresca era ll'aria...e tutto lu ciardino
addurava de rose a ciento passe...
Era de maggio, io no, nun mme ne scordo,
na canzone cantàvamo a doje voce...
Cchiu' tiempo passa e cchiu' mme n'allicordo,
fresca era ll'aria e la canzona doce...
E diceva: "Core, core!
core mio, luntano vaje,
tu mme lasse, io conto ll'ore...
chisà quanno turnarraje!"
Rispunnev'io: "Turnarraggio
quanno tornano li rrose...
si stu sciore torna a maggio,
pure a maggio io stongo ccà...
Si stu sciore torna a maggio,
pure a maggio io stongo ccà."
E si' turnato e mo, comm'a na vota,
cantammo 'nzieme lu mutivo antico;
passa lu tiempo e lu munno s'avota,
ma 'ammore vero no, nun vota vico...
De te, bellezza mia, mme 'nnammuraje,
si t'allicuorde, 'nnanz'a la funtana:
Ll'acqua, lla' dinto, nun se sècca maje,
e ferita d'ammore nun se sana...
Nun se sana: ca sanata,
si se fosse, gioja mia,
'mmiez'a st'aria 'mbarzamata,
a guardarte io nun starrìa !
E te dico: "Core, core!
core mio, turnato io sò'...
Torna maggio e torna 'ammore:
fa' de me chello che vuò!
Torna maggio e torna 'ammore:
fa' de me chello che vuo'!"