FUNTANA ALL'OMBRA
E. A. Mario (1912)
Nel 1912 E.A. Mario proseguendo nella duplice attività di poeta e musicista compositore eseguì una delle più riuscite creazioni: Funtana all'ombra che Gennaro Pasquariello presentò con successo al teatro Politeama.
'Sta funtanella,
ca mèna 'a tantu tiempo ll'acqua chiara,
ha fatto 'a cchiù 'e nu sèculo 'a cummara:
piccerenella,
venette 'a nonna a bevere, e ce steva
nu figliulillo, a ll'ombra, che 'a vedeva...
E, a ll'ombra, tutt'e duje
accumminciajeno a se parlà cu 'o "vvuje"...
po' ognuno 'e lloro se parlaje cu 'o "ttu"...
E, sempe cumpiacente...
sti ffronne, allegramente,
facevano ciù-ciù...
II
Po' ce venette
pur'io na vota ca stevo arzo 'e sete
e ca cercavo 'e vvie fresche e cujete...
E te vedette
e t'accustaste e mm'accustaje pur'io
e 'o core tujo cercava 'o core mio...
Venèttemo 'a doje strate...
e pe' una, ce sperdèttemo abbracciate
pe' ce vasà, pe' nun ce lassà cchiù...
E, sempe cumpiacente...
sti ffronne, allegramente,
facevano ciù-ciù...
III
Quant'ate appriesso,
doppo tante e tant'anne venarranno?
quant'ata matremmonie se farranno?
Mo fanno 'o stesso
quase tutt''e ffigliole 'e stu paese
e, 'a sprùcete ca sò', po' sò' curtese...
E spicialmente 'a 'state,
aspettano 'e figliule 'nnammurate...
e 'sta funtana attacca 'a giuventù!
E, sempe cumpiacente...
sti ffronne, allegramente,
farranno stu ciù-ciù...