VOCE 'E NOTTE
Nicolardi, De Curtis (1904)
Versi di Eduardo Nicolardi e musica di De Curtis. Il poeta si era innamorato di una giovane ragazza ma i genitori, commercianti, che non avevano acconsentito alle nozze, la diedero in sposa ad un ricco ed anziano borghese. Dopo pochi anni morì l'anziano e così i due giovani potettero realizzare il loro sogno.
Si 'sta voce te scèta 'int''a nuttata,
mentre t'astrigne 'o sposo tujo vicino...
Statte scetata, si vuò' stà scetata,
ma fa' vedè ca duorme a suonno chino...
Nun ghì vicino 'e llastre pe' fà 'a spia,
pecchè nun può' sbaglià 'sta voce è 'a mia...
E' 'a stessa voce 'e quanno tutt'e duje,
scurnuse, nce parlàvamo cu 'o "vvuje".
II
Si 'sta voce te canta dint''o core
chello ca nun te cerco e nun te dico;
tutt''o turmiento 'e nu luntano ammore,
tutto ll'ammore 'e nu turmiento antico...
Si te vène na smania 'e vulè bene,
na smania 'e vase còrrere p''e vvène,
nu fuoco che t'abbrucia comm'a che,
vàsate a chillo...che te 'mporta 'e me?
III
Si 'sta voce, che chiagne 'int''a nuttata,
te sceta 'o sposo, nun avè paura...
Vide ch'è senza nomme 'a serenata,
dille ca dorme e che se rassicura...
Dille accussì: "Chi canta 'int'a 'sta via
o sarrà pazzo o more 'e gelusia!
Starrà chiagnenno quacche 'nfamità...
Canta isso sulo...Ma che canta a fà?!..."